أمثال شعبية من الجنوب السوري
كتبهاnada syria ، في 11 تموز 2008 الساعة: 16:00 م
متداولة في بصرى الشام وفي حوران آيضآ
- كفك محنى يا ارشيد
- مال الخسيس بروح بميزان إبليس
- اللي ييجلب ابضاعته بتكسد
- الكلمة بمطرحها قنطار
- عيونه بالبيعة وبيقول يفتح الله
- شالوا من دبسهم وحطوا على طحينهم
- اللي بوكل دهن ببين على شواربه
- غربة وكحل اسود
- خيره لغيره وشره ابتلاني
- الزرده خلفت ورده
- ما صار لك بالقصر إلا من امبارح العصر
- عريان وقع على امسلخ
- صويبعه بين رويبعه
- القمره ما بتيجي إلا ع هوى الحرامي
- اشتري العبد ولا تتعب بتربايته
- الحر لا وقع لا يلبط
- مال الحر على الحر مر
- دلع الحبيب مثل شرب الحليب
- لازم اتبوس الكلب على ثمه حتى تحصل حقك منه
- الشتا بدها رياح والهوش بده صياح
- مثل البساس بتوكل وتنسا
- عند البطون غابت الذهون
- الضعيف ما لوش رغيف
- اللعب بالنار بيجيب دمار
- حل عن سماي ودشرني لقضاي
- قبل ما تناسب حاسب
- بفلوسك بنت السلطان عروسك
- الفقر بلا دين غنى كامل
- الصهر بيشد الظهر
- بلانا ورانا
- الصيت ولا الغنى
- يا قلب لا كثرت همومك نام
- ان وجعك راسك دير اضراسك
- الطايح رايح
- الشهر اللي ما الك فيه لا تعد ايامه
- ما بيحمل همك إلا اللي من دمك
- ما بعد العود قعود
- الضيف عند وصوله أمير وهو بالبيت أسير ويوم يعطي المعازيب الحلف وزير
- صاحب الحق سلطان
- حافظ عالصديق ولو في الحريق
- اليد اللي ما بتقدر تكسرها بوسها وادعي ربك يكسرها
- واحد مربي دقنه والثاني متغلب فيها
- الصمامة ملايمه للفرن
- ما ورا الصبر غير المجرفة والقبر
- بيعطي صوفه للحبل
- إذا بدك تحيره خيره
- لا فات الفوت ما ينفع الصوت
- مفتاح البطن لقمة
- بده يدل حمود ع الخضر
- أني واخوي ع ابن عمي وأني وابن عمي ع الغريب
- اللي بدري بدري واللي ما بدري بيقول كف عدس
- المكتوب معروف من عنوانه
- الاسم كبير والمزرعة خربانة
- الجمل كبير والطبل فاضي
- اللي ما له عتيق ما له جديد
- القرد بعين أمه غزال
- الجار قبل الدار
- إذا جار عليك الزمان عيناك بأولاد الدلال
- اخذ البنات من صدور العمات
- جارك القريب ولا أخوك البعيد
- قلبي ع ولدي وقلب ولدي ع الحجر
- عند السخرة مثل المهرة وعند اشغيلي بتل حيلي
- كون نسيب ولا تكون ابن عم
- ما بيعجبه العجب ولا الصيام برجب
- مع من شفتك شبهتك
- الصاحب ساحب
- مثل نفسك عد صاحبك
- ما أغلى من الولد غير ولد الولد
- كل الدروب بتودي ع الطاحونة
- ثلثين الولد لأخواله
- درب زبيب يودي ما يجيب
- عين القاني ربيعا ً ثاني
- مرت الأب سخط من الرب لا بتحب ولا بتنحب
- ماتت الحمارة وانقطعت الزيارة
- الرفيق قبل الطريق
- بالوجه امراه وبالقفا مذراه
- لسانه مثل مقص السكافي
- يا رايح من غير عزيمة يا قاعد من غير قيمة
- يا رايح كثر ملايح
- اسكت ياحميدي
- وطـّي ياظاهر
- السلاح بيد الفحل بيفلح
- لا ترافق المخزي يخزيك يحط اللي فيه فيك
- لا تسمع من مضحكينك واسمع من مبكينك
- قام يكحلها عماها
- من كل زق رقعة
- لا تكثر الهفة على الملوك يا بيسرقوك يا بيزنوك, ولا تكثر الهفة على أمك وأبوك بيكرهوك
- الجنة بلا ناس ما بتنداس
- لا توخذ حمارة وأمها بالحارة
- اجا الديك من الجبل هجج الجاجات من القن
- من عمود لعمود بيفرجها الرب المعبود
- اطعم الثم بتستحي العين
- القرابة عقربة
- مكان العقرب لا تقرب ومكان الحية افرش ونام
- إذا انجنوا ربعك عقلك ما ينفعك
- اللي بيشوفك بعين شوفوا بثنتين
- قناة تسكسك ولا وادي ينقطع
- الطبخة اللي بيكثر طباخينها بتشوط
- اللي ما له كبير ما له تدبير
- أكبر منك بشهر أعرف منك بدهر
- اللي ما له مدبر ما بيعمر
- كثر التكرار بيفهم الحمار
- من العب للجيبة
- اربط بكير بتحل بكير
- الديك الفصيح من البيضة بيصيح
- الكلمة اللي بتستحي منها أول ما تقولها
- اللي بيستحي من بنت عمه ما بيجيه أولاد
- لا للصدة ولا للردة ولا لعازات الزمان
- تايجي الصبي بنصلي ع النبي
- تا نصل ليها بنصلي عليها
- الحجر اللي ما بيعجبك بيكسر راسك
- قاعد بحضنه وبينتف بدقنه
- هنيال من زار وخفف
- منين ماجيتي يافوله مأكوله
- اصلح شانك مع فدانك
- اللي ما بيطوي وطاه ما بيطوي سماه
- حبي بأحبابه وكل شيء بحسابه
- النسب عند الغانمين أهل
- إن قال اثنين رأسك مش عليك اتلمسه
- برد الصيف أحد من السيف
- السبع بس يكبر بيصير مسخرة للكلاب
- العب على المقصقص تا يجيك الطيار
- على قد فراشك مد رجليك
- دور الغانمين عن اليمين ولو كان أبو زيد عن اليسار
- قاضي الأولاد قتل حاله
- بيع القوت وضوي البيوت
- انقلب من مكار لسحار
- أكل الرجال ع الرجال دين وع الأنذال حسنة
- خليها بالقلب تجرح ولا تطلع لبرا تفضح
- الكذب ملح الرجال وعيب ع اللي بيصدق
- اللي أوله شرط آخره سلامة
- مشارطة بالحقل ولا مجادلة بالبيدر
- يا ماخذ الهم من قلب صاحبه
- بيتعلم البيطرة بحمير النور
- اللي ما هو ببلادك لا إلك ولا لأولادك
- اللي خلفه أبوك إلك ولأخوك
- الطول طول النخلة والعقل عقل سخلة
- قول للمغني غني بيكبر راسه
- من عاشر القوم أربعين يوم صار منهم
- يا طخه يا اكسر مخه
- إذا كثرت الزبدة على العرب بيدهنوا شعرهم
- ما بيجيك أكذب من شب اتغرب وشايب ما تت أجياله
- ما بيطبق على العين غير رموشها
- الأول طلب والثاني اتجوز
- طالع من القفة وقاعد على أذانها
- اطعم الكافر ولا تطعم الحافر
- إن كان صاحبك عسل لا تلحسه كله
- ما حدا بيقول زيتي عكر
- باب عن الكلاب
- بيقتل القتيل وبيمشي بجنازته
- كل من تاش تشيشته وراضي بعيشته
- من سبق لبق
- ما ينبح الكلب غير باب داره
- درب يصد ما يرد
- أصغر منط طبك اصبر على حكم ربك
- اعمل قط من طين واقطع راسه
- زاد الطينة بلة
- القعدة ع البير بدها تدبير
- لا تسأل عن شي ما بيعنيك بتسمع شي ما بيرضيك
- الزين زين ولو قعد من منامه والشين شين ولو غسل بشنان
- اللي عند أهله على مهله
- ما ورا الصبر غير المجرفة والقبر
- اللي من ايده الله يزيده
- حصة الغالي للتالي
- إذا أطعمت اشبع وإذا ضربت أوجع
- لبس قبعه ولحق ربعه
- كل عيش له كريش
- اللي مو لايق بيضايق
كل الشكر والتقدير لكل القائمين بشكبة المعرفة الريفية على جمع المعلومات الرائعة
ـــــــــــــــــــــــــــــــــــــــــــــــــــــــــ
التصنيفات : عادات وتقالييد | السمات:عادات وتقالييد
أرسل الإدراج | دوّن الإدراج
